pindar ki viran-sara mein nahin rahte

pindār kī vīrān-sarā meñ nahīñ rahte

ham ḳhaak pe rahte haiñ ḳhalā meñ nahīñ rahte

qāmat bhī hamārī hai labāda bhī hamārā

māñgī huī dastār-o-qabā meñ nahīñ rahte

ham kashmakash-e-dahr ke paale hue insān

ham girya-kunāñ karb-o-balā meñ nahīñ rahte

ḳhāshāk-e-zamāna haiñ nahīñ ḳhauf hameñ koī

āñdhī se Dareñ vo jo havā meñ nahīñ rahte

ham chhoḌ bhī dete haiñ khulā tausan-e-dil ko

thāme hue har vaqt lagāmeñ nahīñ rahte

rūhoñ meñ utar jaate haiñ tezāb kī sūrat

lafzoñ meñ ghule zahr sadā meñ nahīñ rahte

ehsās ke mausam kabhī ho jaa.eñ jo be-rang

ḳhushbū ke hunar dast-e-sabā meñ nahīñ rahte

ūñchā na uḌo apnī zarūrat se ziyāda

thak jaa.eñ parinde to fazā meñ nahīñ rahte

dastār bane jaate haiñ ab shahr-e-talab meñ

kashkol ki ab dast-e-gadā meñ nahīñ rahte

is ḳhāna-badoshī meñ ḳhudā laa.e na vo din

jab bichhḌe hue yaar du'ā meñ nahīñ rahte

pindar ki viran-sara mein nahin rahte

hum KHak pe rahte hain KHala mein nahin rahte

qamat bhi hamari hai labaada bhi hamara

mangi hui dastar-o-qaba mein nahin rahte

hum kashmakash-e-dahr ke pale hue insan

hum girya-kunan karb-o-bala mein nahin rahte

KHashak-e-zamana hain nahin KHauf hamein koi

aandhi se Daren wo jo hawa mein nahin rahte

hum chhoD bhi dete hain khula tausan-e-dil ko

thame hue har waqt lagamen nahin rahte

ruhon mein utar jate hain tezab ki surat

lafzon mein ghule zahr sada mein nahin rahte

ehsas ke mausam kabhi ho jaen jo be-rang

KHushbu ke hunar dast-e-saba mein nahin rahte

uncha na uDo apni zarurat se ziyaada

thak jaen parinde to faza mein nahin rahte

dastar bane jate hain ab shahr-e-talab mein

kashkol ki ab dast-e-gada mein nahin rahte

is KHana-badoshi mein KHuda lae na wo din

jab bichhDe hue yar du'a mein nahin rahte