pinjre se qafas se to kabhi jal se ubhre

piñjre se qafas se to kabhī jaal se ubhre

kis kis ko batā.eñ ki haiñ kis haal se ubhre

ham pichhlī ḳhizāoñ ke sitam-zāda shagūfe

ham aglī rutoñ meñ jo na.ī Daal se ubhre

ham koh-e-girāñ ban ke kabhī sū-e-zamīñ par

ban kar kabhī laavā hamī pātāl se ubhre

ham ahl-e-sadāqat hī rahe shaah ke munkir

darbār meñ jo maare to chaupāl se ubhre

nākām mohabbat ke haiñ ham chheḌe hue giit

sāzindoñ ke sur se to kabhī taal se ubhre

haiñ mujh se nichoḌe hue ḳhuuñ kā haiñ natīja

vo rang jo haiñ tere ḳhad-o-ḳhāl se ubhre

ham sho.abda-gar ke rahe hāthoñ meñ khilaune

āvāz pe taalī kī jo rūmāl se ubhre

pinjre se qafas se to kabhi jal se ubhre

kis kis ko bataen ki hain kis haal se ubhre

hum pichhli KHizaon ke sitam-zada shagufe

hum agli ruton mein jo nai Dal se ubhre

hum koh-e-giran ban ke kabhi su-e-zamin par

ban kar kabhi lawa hami patal se ubhre

hum ahl-e-sadaqat hi rahe shah ke munkir

darbar mein jo mare to chaupal se ubhre

nakaam mohabbat ke hain hum chheDe hue git

sazindon ke sur se to kabhi tal se ubhre

hain mujh se nichoDe hue KHun ka hain natija

wo rang jo hain tere KHad-o-KHal se ubhre

hum shoabda-gar ke rahe hathon mein khilaune

aawaz pe tali ki jo rumal se ubhre