piya jin mukh tera dekha use phir kya dikhana hai

piyā jin mukh tirā dekhā use phir kyā dikhānā hai

chakhā jin ras tire lab kā use phir kyā chakhānā hai

huā hai dil mirā kolā birah kī aag ke bhītar

asī jartī añgārī kuuñ kaho ab kyā jarānā hai

na aaqil huuñ na dīvāna na mahram huuñ na begāna

ase behosh be-ḳhud kuuñ kaho phir kyā batānā hai

judā.ī se jare aalam jarūñ maiñ rū-ba-rū har dam

ase majnūñ divāna kuuñ kaho phir kyā satānā hai

girā kar shīsha-e-dil kuuñ lage jaur-o-jafā karne

ḳhudā se Tuk Daro zālim gire kuuñ kyā girānā hai

piyā kā dars jin paaya hoyā nādāñ na jaane kuchh

liyā jin sabq vahdat kā use phir kyā paḌhānā hai

fanā ke bahr-e-qulzum muuñ paḌā ye dil gayā guzrā

na jaage roz-e-mahshar ke use phir kyā jagānā hai

piyā jin jām-e-vahdat kā na rākhe ḳhauf suulī kā

anal-haq jab hoyā al-haq use phir kyā Darānā hai

sunūñ har jā suḳhan terā dekhūñ sab muuñ ruḳhan terā

tirā huuñ maiñ sajan terā mujhe phir kyā lubhānā hai

'ġhulām'-e-shāh-e-fāzil kā kahe dil suuñ suno yaaro

dekhā maiñ shah muhī.uddiñ mujhe phir kyā dikhānā hai

piya jin mukh tera dekha use phir kya dikhana hai

chakha jin ras tere lab ka use phir kya chakhana hai

hua hai dil mera kola birah ki aag ke bhitar

asi jarti angari kun kaho ab kya jarana hai

na aaqil hun na diwana na mahram hun na begana

ase behosh be-KHud kun kaho phir kya batana hai

judai se jare aalam jarun main ru-ba-ru har dam

ase majnun diwana kun kaho phir kya satana hai

gira kar shisha-e-dil kun lage jaur-o-jafa karne

KHuda se Tuk Daro zalim gire kun kya girana hai

piya ka dars jin paya hoya nadan na jaane kuchh

liya jin sabq wahdat ka use phir kya paDhana hai

fana ke bahr-e-qulzum mun paDa ye dil gaya guzra

na jage roz-e-mahshar ke use phir kya jagana hai

piya jin jam-e-wahdat ka na rakhe KHauf suli ka

anal-haq jab hoya al-haq use phir kya Darana hai

sunun har ja suKHan tera dekhun sab mun ruKHan tera

tera hun main sajan tera mujhe phir kya lubhana hai

'ghulam'-e-shah-e-fazil ka kahe dil sun suno yaro

dekha main shah muhiuddin mujhe phir kya dikhana hai