piye jata hun saqi ki nazar se

piye jaatā huuñ saaqī kī nazar se

mujhe kyā gardish-e-shām-o-sahar se

munāsib hai ġhurūr-e-husn lekin

utar jā.egā saudā bhī ye sar se

ye kin biite dinoñ kī yaad aa.ī

ye kaise ashk Tapke chashm-e-tar se

bahut mashshāq hogā rahzanī meñ

kise thī ye tavaqqo rāhbar se

sitam Dhā kar hamāre dil pe aksar

zamāna ḳhud girā apnī nazar se

tire jalvoñ kī tābānī kā aalam

koī dekhe zarā merī nazar meñ

kisī kī mast āñkhoñ ke tasadduq

yaqīñ uThne lagā hai maut par se

tumheñ chāhūñ to kis buute pe chāhūñ

tumheñ dekhūñ to dekhūñ kis nazar se

qadam raqsāñ jahāñ aalam junūñ ne

koī tūfāñ uThe is rahguzar se

bahut bigḌe hue haiñ un ke tevar

nazar aatā hai ye un kī nazar se

bharī mahfil meñ iz.hār-e-mohabbat

ye laġhzish aur phir merī nazar se

uThā.e maut hī phir un ko 'āsī'

girā dete haiñ vo jin ko nazar se

piye jata hun saqi ki nazar se

mujhe kya gardish-e-sham-o-sahar se

munasib hai ghurur-e-husn lekin

utar jaega sauda bhi ye sar se

ye kin bite dinon ki yaad aai

ye kaise ashk Tapke chashm-e-tar se

bahut mashshaq hoga rahzani mein

kise thi ye tawaqqo rahbar se

sitam Dha kar hamare dil pe aksar

zamana KHud gira apni nazar se

tere jalwon ki tabani ka aalam

koi dekhe zara meri nazar mein

kisi ki mast aankhon ke tasadduq

yaqin uThne laga hai maut par se

tumhein chahun to kis bute pe chahun

tumhein dekhun to dekhun kis nazar se

qadam raqsan jahan aalam junun ne

koi tufan uThe is rahguzar se

bahut bigDe hue hain un ke tewar

nazar aata hai ye un ki nazar se

bhari mahfil mein izhaar-e-mohabbat

ye laghzish aur phir meri nazar se

uThae maut hi phir un ko 'asi'

gira dete hain wo jin ko nazar se