poshida sab ki aankh se dil ki kitab rakh

poshīda sab kī aañkh se dil kī kitāb rakh

mumkin ho gar to zaḳhm ke badle gulāb rakh

ehsān karke bhuul jā ehsān mat jatā

kis kis ko kyā diyā hai kabhī mat hisāb rakh

sehn-e-chaman ke ġhunchoñ meñ taqsīm kar ḳhushī

shabnam kī tarah qalb kī āñkheñ pur-āb rakh

dīmak-zada kutub se na almāriyāñ sajā

paḌhne ko tajrabāt kī zinda kitāb rakh

nākāmiyoñ kī dhuup meñ kaTtī hai zindagī

dil ke sukūn ke liye āñkhoñ meñ ḳhvāb rakh

har zarra ko chamakne kā andāz baḳhsh de

har sub.h-e-nau ke vāste ik āftāb rakh

'shāhīn' zindagī ko banānā ho kāmyāb

ḳhisht-e-savāl ke liye sang-e-javāb rakh

poshida sab ki aankh se dil ki kitab rakh

mumkin ho gar to zaKHm ke badle gulab rakh

ehsan karke bhul ja ehsan mat jata

kis kis ko kya diya hai kabhi mat hisab rakh

sehn-e-chaman ke ghunchon mein taqsim kar KHushi

shabnam ki tarah qalb ki aankhen pur-ab rakh

dimak-zada kutub se na almariyan saja

paDhne ko tajrabaat ki zinda kitab rakh

nakaamiyon ki dhup mein kaTti hai zindagi

dil ke sukun ke liye aankhon mein KHwab rakh

har zarra ko chamakne ka andaz baKHsh de

har subh-e-nau ke waste ek aaftab rakh

'shahin' zindagi ko banana ho kaamyab

KHisht-e-sawal ke liye sang-e-jawab rakh