pur-soz jigar ke nale bhi dil-soz nikalte rahte hain

pur-soz jigar ke naale bhī dil-soz nikalte rahte haiñ

haañ sham.a bhī jaltī rahtī hai parvāne bhī jalte rahte haiñ

ḳhuddām-e-harīm-e-nāz jo haiñ allāh re un kī ḳhush-baḳhtī

dīdār bhī hotā rahtā hai armāñ bhī nikalte rahte haiñ

ġhurbat meñ vatan aur ahl-e-vatan kī yaad jab aa jaatī hai mujhe

dil hai ki taḌaptā rahtā hai aur ashk bhī Dhalte rahte haiñ

ai shaiḳh-o-barahman dekhtā huuñ din raat tumhāre murdoñ ko

ye ḳhaak meñ milte rahte haiñ vo aag meñ jalte rahte haiñ

ā.īna husn-e-sabīh bhī kyā dekhe ki vo vaqt-e-nazzāra

dam bhar nahīñ jamte shauq-e-nazar ke paañv phisalte rahte haiñ

ai shaiḳh-e-haram e.ajāz hai ye pur-kaif nigāh-e-sāqī kā

bā-hosh to girte rahte haiñ behosh sambhalte rahte haiñ

ārām-o-musībat kyā shai hai hotā nahīñ kuchh ehsās unheñ

manzil kī jo dhun meñ haiñ 'sābir' din-rāt vo chalte rahte haiñ

pur-soz jigar ke nale bhi dil-soz nikalte rahte hain

han shama bhi jalti rahti hai parwane bhi jalte rahte hain

KHuddam-e-harim-e-naz jo hain allah re un ki KHush-baKHti

didar bhi hota rahta hai arman bhi nikalte rahte hain

ghurbat mein watan aur ahl-e-watan ki yaad jab aa jati hai mujhe

dil hai ki taDapta rahta hai aur ashk bhi Dhalte rahte hain

ai shaiKH-o-barahman dekhta hun din raat tumhaare murdon ko

ye KHak mein milte rahte hain wo aag mein jalte rahte hain

aaina husn-e-sabih bhi kya dekhe ki wo waqt-e-nazzara

dam bhar nahin jamte shauq-e-nazar ke panw phisalte rahte hain

ai shaiKH-e-haram eajaz hai ye pur-kaif nigah-e-saqi ka

ba-hosh to girte rahte hain behosh sambhalte rahte hain

aaram-o-musibat kya shai hai hota nahin kuchh ehsas unhen

manzil ki jo dhun mein hain 'sabir' din-raat wo chalte rahte hain