purana qissa tamam karna paDega usko

purānā qissa tamām karnā paḌegā us ko

na.e taqāzoñ pe kaam karnā paḌegā us ko

vo ḳhalvatoñ meñ agar kisī ko pukārtā hai

to apnā ūñchā maqām karnā paḌegā us ko

agar vo aivān-e-āshiqī se juḌā hai to phir

ḳhud apnā bhī ehtirām karnā paḌegā us ko

sab apnī apnī rivāyatoñ ko bhulā rahe haiñ

kuchh aur rasmoñ ko aam karnā paḌegā us ko

usī kī nigrāniyoñ meñ haiñ ab ye bastiyāñ bhī

yahāñ bhī kuchh din qayām karnā paḌegā us ko

vo chāhtā hai agar bulandī banī rahe to

havā ko apnā ġhulām karnā paḌegā us ko

agar nigāhoñ meñ āfiyat hai to sehn-e-dil meñ

jo kuchh hai ḳhvāboñ ke naam karnā paḌegā us ko

sunā hai 'rāhat' koī qayāmat hai aane vaalī

abhī se kuchh intizām karnā paḌegā us ko

purana qissa tamam karna paDega us ko

nae taqazon pe kaam karna paDega us ko

wo KHalwaton mein agar kisi ko pukarta hai

to apna uncha maqam karna paDega us ko

agar wo aiwan-e-ashiqi se juDa hai to phir

KHud apna bhi ehtiram karna paDega us ko

sab apni apni riwayaton ko bhula rahe hain

kuchh aur rasmon ko aam karna paDega us ko

usi ki nigraniyon mein hain ab ye bastiyan bhi

yahan bhi kuchh din qayam karna paDega us ko

wo chahta hai agar bulandi bani rahe to

hawa ko apna ghulam karna paDega us ko

agar nigahon mein aafiyat hai to sehn-e-dil mein

jo kuchh hai KHwabon ke nam karna paDega us ko

suna hai 'rahat' koi qayamat hai aane wali

abhi se kuchh intizam karna paDega us ko