purane ahd-name gar ufuq par naqsh ho jate

purāne ahd-nāme gar 'ufuq par naqsh ho jaate

muqaddas abr-pāre is zamīñ ke zaḳhm dho jaate

agar ik sūrmā ran meñ savere sar na de jaatā

ka.ī be-nām pyāde shaam kī ghāTī meñ kho jaate

havelī se tilismī bāñsurī kī lai nidā detī

kahānī kahte kahte qissa-go DyoḌhī meñ so jaate

sulagtī thī mahalle meñ nahūsat kī agarbattī

farishte phir yahāñ 'ūd-e-sa'ādat kaise bo jaate

agar āshuftagī kī aañch se diide na jal uThte

parī-zādoñ ke paañv āñsuoñ se ham bhigo jaate

chhalaktī hoñgī āvāzeñ samā'at ke piyāloñ se

kabhī sochā ki is manzar ko āñkhoñ meñ Dubo jaate

uqūbat-gāh-e-duniyā se chale jab to ḳhayāl aayā

ḳhamoshī ke badan meñ apnī chīḳheñ hī chubho jaate

azal se thā yahī mā'mūl būḌhe devtāoñ kā

thakan se sub.h-dam bistar pe girte aur so jaate

purane ahd-name gar 'ufuq par naqsh ho jate

muqaddas abr-pare is zamin ke zaKHm dho jate

agar ek surma ran mein sawere sar na de jata

kai be-nam pyaade sham ki ghaTi mein kho jate

haweli se tilismi bansuri ki lai nida deti

kahani kahte kahte qissa-go DyoDhi mein so jate

sulagti thi mahalle mein nahusat ki agarbatti

farishte phir yahan 'ud-e-sa'adat kaise bo jate

agar aashuftagi ki aanch se dide na jal uThte

pari-zadon ke panw aansuon se hum bhigo jate

chhalakti hongi aawazen sama'at ke piyalon se

kabhi socha ki is manzar ko aankhon mein Dubo jate

uqubat-gah-e-duniya se chale jab to KHayal aaya

KHamoshi ke badan mein apni chiKHen hi chubho jate

azal se tha yahi ma'mul buDhe dewtaon ka

thakan se subh-dam bistar pe girte aur so jate