purane rang mein ashk-e-gham taza milata hun

purāne rañg meñ ashk-e-ġham taaza milātā huuñ

dar-o-dīvār par kuchh aks-e-nā-dīda sajātā huuñ

mujhe sahrā-navardī raas aatī jā rahī hai ab

ḳharābāt-e-chaman meñ lāla-o-sausan ugātā huuñ

mire is shauq se dariyā kināre sab shanāsā haiñ

jahāñ tūfāñ ho maujoñ kā vahāñ lañgar uThātā huuñ

tumhārī naġhma-sanjī kī dukāñ par jo nahīñ miltā

vahī ik naġhma-e-pur-soz maiñ sab ko sunātā huuñ

na jaane kis nagar ābād ho jaatī haiñ vo jā kar

maiñ aksar shaam ko chhat se patañgeñ jo uḌātā huuñ

paḌe haiñ aable lekin qadam phir bhī haiñ barjasta

maiñ kab se laash apnī apne kāñdhoñ par uThātā huuñ

purane rang mein ashk-e-gham taza milata hun

dar-o-diwar par kuchh aks-e-na-dida sajata hun

mujhe sahra-nawardi ras aati ja rahi hai ab

KHarabaat-e-chaman mein lala-o-sausan ugata hun

mere is shauq se dariya kinare sab shanasa hain

jahan tufan ho maujon ka wahan langar uThata hun

tumhaari naghma-sanji ki dukan par jo nahin milta

wahi ek naghma-e-pur-soz main sab ko sunata hun

na jaane kis nagar aabaad ho jati hain wo ja kar

main aksar sham ko chhat se patangen jo uData hun

paDe hain aable lekin qadam phir bhi hain barjasta

main kab se lash apni apne kandhon par uThata hun