puchh lo gar jhuT kahta hun dil-e-nakaam se

pūchh lo gar jhuuT kahtā huuñ dil-e-nākām se

sub.h kī hai aaj bhī ro ro ke maiñ ne shaam se

sābiqa hai roz-e-fardā us but-e-ḳhud-kām se

qabr meñ sone de ai dil do ghaḌī ārām se

ro rahe haiñ ab to dushman bhī janāze par khaḌe

aap bhī gardan uThā kar dekh lete baam se

aa ga.ī hai yaad mujh ko gardish-e-chashm-e-nigār

sāqiyā nazzāra-e-daur-e-mai-e-gulfām se

koī mar jaa.e ki furqat meñ rahe zinda ba-gor

un ko apne kaam se matlab hai apne naam se

chhuT ke peshānī kī afshāñ dekheñ kis kis par gire

bijliyāñ nāhaq girāte haiñ vo baiThe baam se

baad murdan ho galī us kī ki dasht-e-ḳhār-ḳhār

vaañ bhī rahte chain se aur yaañ bhī haiñ ārām se

zahr ho lekin vo mujh ko apne hāthoñ se to de

yuuñ to matlab jaam se hai aur na daur-e-jām se

āshiqī achchhī sahī anjām-e-ishq achchhā nahīñ

ai 'haqīr' ab darguzar kar is ḳhayāl-e-ḳhām se

puchh lo gar jhuT kahta hun dil-e-nakaam se

subh ki hai aaj bhi ro ro ke main ne sham se

sabiqa hai roz-e-farda us but-e-KHud-kaam se

qabr mein sone de ai dil do ghaDi aaram se

ro rahe hain ab to dushman bhi janaze par khaDe

aap bhi gardan uTha kar dekh lete baam se

aa gai hai yaad mujh ko gardish-e-chashm-e-nigar

saqiya nazzara-e-daur-e-mai-e-gulfam se

koi mar jae ki furqat mein rahe zinda ba-gor

un ko apne kaam se matlab hai apne nam se

chhuT ke peshani ki afshan dekhen kis kis par gire

bijliyan nahaq giraate hain wo baiThe baam se

baad murdan ho gali us ki ki dasht-e-KHar-KHar

wan bhi rahte chain se aur yan bhi hain aaram se

zahr ho lekin wo mujh ko apne hathon se to de

yun to matlab jam se hai aur na daur-e-jam se

aashiqi achchhi sahi anjam-e-ishq achchha nahin

ai 'haqir' ab darguzar kar is KHayal-e-KHam se