puchhe hai mera dil teri tanhai se kya kya

pūchhe hai mirā dil tirī tanhā.ī se kyā kyā

pahlū meñ koī shaḳhs numūdār huā kyā

dil sail-e-havas meñ to pahuñchtā hai kahīñ aur

mad.hosh musāfir ho to manzil kā pata kyā

ai zehn-e-rasā kuchh sipar-andāz to ho jā

dekheñ to javāb aate haiñ aflāk se kyā kyā

kyuuñ phailtī jaatī hai koī ḳhushbū-e-mānūs

dil abr kī mānind tire dar se uThā kyā

ai rahbar-e-mārūf ye taskīn-e-safar kyuuñ

tujh ko nazar aayā mirā naqsh-e-kaf-e-pā kyā

aayā huuñ barī ho ke maiñ aivān-e-ḳhirad se

ye shahr-e-mohabbat hai yahāñ merī sazā kyā

ik zaḳhm mahaktā hai tumhārā rag-e-jāñ par

samjhūñ maiñ use apnī vafāoñ kā sila kyā

hai mahv-e-tamannā dil-e-āzurda ki dekhe

pindār-e-mohabbat meñ hai andāz-e-ḳhudā kyā

'āfāq' mire chāñd ke baare meñ na pūchho

aa jaa.e vo añgḌā.ī pe to raqs-e-sabā kyā

puchhe hai mera dil teri tanhai se kya kya

pahlu mein koi shaKHs numudar hua kya

dil sail-e-hawas mein to pahunchta hai kahin aur

madhosh musafir ho to manzil ka pata kya

ai zehn-e-rasa kuchh sipar-andaz to ho ja

dekhen to jawab aate hain aflak se kya kya

kyun phailti jati hai koi KHushbu-e-manus

dil abr ki manind tere dar se uTha kya

ai rahbar-e-maruf ye taskin-e-safar kyun

tujh ko nazar aaya mera naqsh-e-kaf-e-pa kya

aaya hun bari ho ke main aiwan-e-KHirad se

ye shahr-e-mohabbat hai yahan meri saza kya

ek zaKHm mahakta hai tumhaara rag-e-jaan par

samjhun main use apni wafaon ka sila kya

hai mahw-e-tamanna dil-e-azurda ki dekhe

pindar-e-mohabbat mein hai andaz-e-KHuda kya

'afaq' mere chand ke bare mein na puchho

aa jae wo angDai pe to raqs-e-saba kya