puchho na ye firaq mein kya tera haal hai

pūchho na ye firāq meñ kyā terā haal hai

marnā kamāl-e-sahl hai jiinā muhāl hai

ye husn huur kā na parī kā jamāl hai

ḳhūbān-e-dahr meñ to 'adīm-ul-misāl hai

ai jazb-e-'ishq sirf ye terā kamāl hai

un kā mujhe ḳhayāl unheñ merā ḳhayāl hai

bīmār-e-dard-o-ġham kī haqīqat na pūchhiye

kal aur haal us kā thā aaj aur haal hai

ik chaudhvīñ ke chāñd pe hī munhasir nahīñ

yūñhī har ek shai ko urūj-o-zavāl hai

vāqif haiñ mehr-o-mah kī haqīqat se ḳhuub ham

is meñ tirā jalāl hai is meñ jamāl hai

mirrīḳh kāñptā hai tumhāre jalāl se

tum se milā.e aañkh ye kis kī majāl hai

kar dūñgā sard nār-e-jahannam ko hashr meñ

kaafī use mirā 'araq-e-infi'āl hai

us sarv-qad ke qad se hai jis aadmī ko 'ishq

sarsabz hai vo baaġh jahāñ meñ nihāl hai

ai shaiḳh salsabīl ho yā ho do-ātisha

piinā koī harām nahīñ hai halāl hai

'sābir' tirā kalām suneñ kyuuñ na ahl-e-fan

bandish 'ajab hai aur 'ajab bol-chāl hai

puchho na ye firaq mein kya tera haal hai

marna kamal-e-sahl hai jina muhaal hai

ye husn hur ka na pari ka jamal hai

KHuban-e-dahr mein to 'adim-ul-misal hai

ai jazb-e-'ishq sirf ye tera kamal hai

un ka mujhe KHayal unhen mera KHayal hai

bimar-e-dard-o-gham ki haqiqat na puchhiye

kal aur haal us ka tha aaj aur haal hai

ek chaudhwin ke chand pe hi munhasir nahin

yunhi har ek shai ko uruj-o-zawal hai

waqif hain mehr-o-mah ki haqiqat se KHub hum

is mein tera jalal hai is mein jamal hai

mirriKH kanpta hai tumhaare jalal se

tum se milae aankh ye kis ki majal hai

kar dunga sard nar-e-jahannam ko hashr mein

kafi use mera 'araq-e-infi'al hai

us sarw-qad ke qad se hai jis aadmi ko 'ishq

sarsabz hai wo bagh jahan mein nihaal hai

ai shaiKH salsabil ho ya ho do-atisha

pina koi haram nahin hai halal hai

'sabir' tera kalam sunen kyun na ahl-e-fan

bandish 'ajab hai aur 'ajab bol-chaal hai