puchhta hai ai but-e-be-pir kya

pūchhtā hai ai but-e-be-pīr kyā

kyā kahūñ hai ranj dāman-gīr kyā

kyoñ ḳhafā ho merī qismat kī tarah

kuchh kaho to hai mirī taqsīr kyā

le rahā hai mahfil-e-dildār meñ

sham.a ke bose lab-e-gul-gīr kyā

ishq meñ ik ġhuncha-lab kī kyā kahūñ

chup huuñ shakl-e-bulbul-e-tasvīr kyā

tīr-e-āh-e-sho.ala-zā ke sāmne

ai sanam buniyād-e-charḳh-e-pīr kyā

be-takalluf har dahān-e-zaḳhm ke

bose letī hai zabān-e-tīr kyā

haif baḌh baḌh kar nigāh-e-yār meñ

ghaT ga.e ham sūrat-e-tauqīr kyā

jald uThā lā ḳhanjar-e-ḳhūñ-ḳhvār ko

qatl meñ qātil hai ab tāḳhīr kyā

ek yār-e-naujavāñ ke ishq meñ

dekhiye dikhlā.e charḳh-e-pīr kyā

mere jī uThne kī ai īsā-nafas

zehn meñ hai aap ke tadbīr kyā

azm-e-qatl-e-āshiq-e-jāñbāz se

fā.eda hai ai but-e-be-pīr kyā

ḳhāna-e-zindāñ meñ mere ashk kī

qadr jaane dīda-e-zanjīr kyā

ai 'shagufta' us but-e-tarrār se

pesh jā.egī mirī taqdīr kyā

puchhta hai ai but-e-be-pir kya

kya kahun hai ranj daman-gir kya

kyon KHafa ho meri qismat ki tarah

kuchh kaho to hai meri taqsir kya

le raha hai mahfil-e-dildar mein

shama ke bose lab-e-gul-gir kya

ishq mein ek ghuncha-lab ki kya kahun

chup hun shakl-e-bulbul-e-taswir kya

tir-e-ah-e-shoala-za ke samne

ai sanam buniyaad-e-charKH-e-pir kya

be-takalluf har dahan-e-zaKHm ke

bose leti hai zaban-e-tir kya

haif baDh baDh kar nigah-e-yar mein

ghaT gae hum surat-e-tauqir kya

jald uTha la KHanjar-e-KHun-KHwar ko

qatl mein qatil hai ab taKHir kya

ek yar-e-naujawan ke ishq mein

dekhiye dikhlae charKH-e-pir kya

mere ji uThne ki ai isa-nafas

zehn mein hai aap ke tadbir kya

azm-e-qatl-e-ashiq-e-jaanbaz se

faeda hai ai but-e-be-pir kya

KHana-e-zindan mein mere ashk ki

qadr jaane dida-e-zanjir kya

ai 'shagufta' us but-e-tarrar se

pesh jaegi meri taqdir kya