puchhte hain teri hasrat kya hai

pūchhte haiñ tirī hasrat kyā hai

aaj mujh par ye ināyat kyā hai

kyā kahūñ rang-e-tabī.at kyā hai

ek aafat hai mohabbat kyā hai

zab.h karte ho jo muñh pher ke tum

aisī bhī merī muravvat kyā hai

jis meñ tum ḳhush usī meñ maiñ ḳhush huuñ

ranj kyā chiiz hai rāhat kyā hai

boltī hī nahīñ tasvīr tirī

phir mire jiine kī sūrat kyā hai

kisī āvāra-vatan se pūchho

mehrbāñ-vārī-e-ġhurbat kyā hai

zab.h ke vaqt rukā bhī ḳhanjar

ye na pūchhā tirī hasrat kyā hai

umr guzrī usī ke kūche meñ

ham se pūchho ki mohabbat kyā hai

mai ho sabza ho ghaTā ho tum ho

is se achchhī mujhe jannat kyā hai

ġhair se va.ada lahad par merī

ye qayāmat sar-e-turbat kyā hai

ye to hai ain mohabbat ai dil

un ke shikve kī shikāyat kyā hai

shaiḳh jī roza to din meñ hogā

shab ko piine meñ qabāhat kyā hai

mujh se kahtī hai ye vahshat merī

ghar meñ rahne kī zarūrat kyā hai

bhuul kar bhī na kabhī ye pūchhā

haal bīmār-e-mohabbat kyā hai

ham ne ḳhud piine se tauba kar lī

shaiḳh sāhab kī karāmat kyā hai

sajde kartā huuñ dar-e-jānāñ par

aur ā.īn-e-mohabbat kyā hai

zikr-e-mai aur janāb-e-vā.iz

nahīñ mālūm ki niyyat kyā hai

ek Thokar se uThī hai sau baar

aap ke aage qayāmat kyā hai

jaan hī le ke Talegī 'safdar'

ik balā hai shab-e-furqat kyā hai

puchhte hain teri hasrat kya hai

aaj mujh par ye inayat kya hai

kya kahun rang-e-tabiat kya hai

ek aafat hai mohabbat kya hai

zabh karte ho jo munh pher ke tum

aisi bhi meri murawwat kya hai

jis mein tum KHush usi mein main KHush hun

ranj kya chiz hai rahat kya hai

bolti hi nahin taswir teri

phir mere jine ki surat kya hai

kisi aawara-watan se puchho

mehrban-wari-e-ghurbat kya hai

zabh ke waqt ruka bhi KHanjar

ye na puchha teri hasrat kya hai

umr guzri usi ke kuche mein

hum se puchho ki mohabbat kya hai

mai ho sabza ho ghaTa ho tum ho

is se achchhi mujhe jannat kya hai

ghair se wada lahad par meri

ye qayamat sar-e-turbat kya hai

ye to hai ain mohabbat ai dil

un ke shikwe ki shikayat kya hai

shaiKH ji roza to din mein hoga

shab ko pine mein qabahat kya hai

mujh se kahti hai ye wahshat meri

ghar mein rahne ki zarurat kya hai

bhul kar bhi na kabhi ye puchha

haal bimar-e-mohabbat kya hai

hum ne KHud pine se tauba kar li

shaiKH sahab ki karamat kya hai

sajde karta hun dar-e-jaanan par

aur aain-e-mohabbat kya hai

zikr-e-mai aur janab-e-waiz

nahin malum ki niyyat kya hai

ek Thokar se uThi hai sau bar

aap ke aage qayamat kya hai

jaan hi le ke Talegi 'safdar'

ek bala hai shab-e-furqat kya hai