puchhte hain tujhko saffaki kahan rah kar mili

pūchhte haiñ tujh ko saffākī kahāñ rah kar milī

ye karāmat bheḌiyoñ ke darmiyāñ rah kar milī

hādsoñ kī zad meñ rahte haiñ zamīn-o-āsmāñ

kaun sī achchhī ḳhabar mujh ko yahāñ rah kar milī

har-nafas mujh ko aziyyat kā safar karnā paḌā

zindagī mujh se hamesha bad-gumāñ rah kar milī

ik tilāvat ne mirī sāñsoñ ko baḳhshā hai davām

zindagī mujh ko sar-e-nok-e-sināñ rah kar milī

ya.anī tere sab sitam mujh par karam sābit hue

ya.anī terī har balā hī mehrbāñ rah kar milī

zahr ik miqdār meñ us ne diyā hai is liye

taqviyat mujh ko hamesha nīm-jāñ rah kar milī

maiñ usī kā markazī kirdār huuñ kyā ilm thā

vo kahānī jo darūn-e-dāstāñ rah kar milī

jo bhī kahte ho utar jaatā hai mere dil meñ 'zeb'

aisī laffāzī batāo to kahāñ rah kar malī

puchhte hain tujh ko saffaki kahan rah kar mili

ye karamat bheDiyon ke darmiyan rah kar mili

hadson ki zad mein rahte hain zamin-o-asman

kaun si achchhi KHabar mujh ko yahan rah kar mili

har-nafas mujh ko aziyyat ka safar karna paDa

zindagi mujh se hamesha bad-guman rah kar mili

ek tilawat ne meri sanson ko baKHsha hai dawam

zindagi mujh ko sar-e-nok-e-sinan rah kar mili

yani tere sab sitam mujh par karam sabit hue

yani teri har bala hi mehrban rah kar mili

zahr ek miqdar mein us ne diya hai is liye

taqwiyat mujh ko hamesha nim-jaan rah kar mili

main usi ka markazi kirdar hun kya ilm tha

wo kahani jo darun-e-dastan rah kar mili

jo bhi kahte ho utar jata hai mere dil mein 'zeb'

aisi laffazi batao to kahan rah kar mali