puchhte hain wo ishq ka matlab

pūchhte haiñ vo ishq kā matlab

ab nikal jā.egā mirā matlab

us pe zāhir huā mirā matlab

kaash puurā kare ḳhudā matlab

kah diyā un se barmalā matlab

ab ḳhudā chāhe to huā matlab

baat puurī abhī nahīñ niklī

muñh se tum le uḌe mirā matlab

kahte haiñ arz-e-vasl par vo kaho

dūsrī baat dūsrā matlab

hai ye matlab na kuchh zabāñ se kahūñ

maiñ samajhtā huuñ aap kā matlab

jo tamannā hai tum pe zāhir hai

har ghaḌī pūchhne se kyā matlab

dil meñ jo kuchh thā un se kah na sakā

lab pe aa aa ke rah gayā matlab

mudda.ā hai vahī jo pahle thā

aur maiñ kyā kahūñ nayā matlab

rū-ba-rū un ke baat kar na sakā

ḳhat meñ āḳhir ko likh diyā matlab

baat kyā hai vo mujh se pūchhte haiñ

vāqi.a qissa mājrā matlab

vāsta ġhair kā nahīñ achchhā

ḳhuub bantā hai barmalā matlab

tum jo mil jaao kaam ban jaa.e

aur us ke sivā hī kyā matlab

aaj ḳhush ḳhush bashīr phirte haiñ

niklā armān mudda.ā matlab

puchhte hain wo ishq ka matlab

ab nikal jaega mera matlab

us pe zahir hua mera matlab

kash pura kare KHuda matlab

kah diya un se barmala matlab

ab KHuda chahe to hua matlab

baat puri abhi nahin nikli

munh se tum le uDe mera matlab

kahte hain arz-e-wasl par wo kaho

dusri baat dusra matlab

hai ye matlab na kuchh zaban se kahun

main samajhta hun aap ka matlab

jo tamanna hai tum pe zahir hai

har ghaDi puchhne se kya matlab

dil mein jo kuchh tha un se kah na saka

lab pe aa aa ke rah gaya matlab

muddaa hai wahi jo pahle tha

aur main kya kahun naya matlab

ru-ba-ru un ke baat kar na saka

KHat mein aaKHir ko likh diya matlab

baat kya hai wo mujh se puchhte hain

waqia qissa majra matlab

wasta ghair ka nahin achchha

KHub banta hai barmala matlab

tum jo mil jao kaam ban jae

aur us ke siwa hi kya matlab

aaj KHush KHush bashir phirte hain

nikla arman muddaa matlab