puri mere junun ki zarurat na kar sake

puurī mire junūñ kī zarūrat na kar sake

sahrā-e-jāñ bhī ho to kifālat na kar sake

sa.ī-o-amal kī ruuh mohabbat ke saath thī

vo kuchh na kar sake jo mohabbat na kar sake

duniyā meñ jitne ġham mile dil meñ basā liye

ham sirf tere ġham pe qanā.at na kar sake

apnā hī hāl-e-zār sunāte rahe tujhe

lekin tire sitam kī shikāyat na kar sake

tārāj kar ke ishq kī bastī chale ga.e

tum fat.h kar ke dil pe hukūmat na kar sake

duniyā meñ ab bhī log vafā ke haiñ mudda.ī

hāsil hamāre haal se ibrat na kar sake

hai kāfir-e-adab mire mashrab meñ ai 'sabā'

shā.ir jo ehtirām rivāyat na kar sake

puri mere junun ki zarurat na kar sake

sahra-e-jaan bhi ho to kifalat na kar sake

sai-o-amal ki ruh mohabbat ke sath thi

wo kuchh na kar sake jo mohabbat na kar sake

duniya mein jitne gham mile dil mein basa liye

hum sirf tere gham pe qanaat na kar sake

apna hi haal-e-zar sunate rahe tujhe

lekin tere sitam ki shikayat na kar sake

taraj kar ke ishq ki basti chale gae

tum fath kar ke dil pe hukumat na kar sake

duniya mein ab bhi log wafa ke hain muddai

hasil hamare haal se ibrat na kar sake

hai kafir-e-adab mere mashrab mein ai 'saba'

shair jo ehtiram riwayat na kar sake