pyar ka zamane mein humne ye sila paya

pyaar kā zamāne meñ ham ne ye sila paayā

dostoñ ne luuTā hai zindagī kā sarmāyā

band ho ga.e ham par dostoñ ke darvāze

daur-e-muflisī tū ne aisā din bhī dikhlāyā

maiñ ne ḳhūn-e-dil pī kar zindagī guzārī hai

maiñ ne dast-e-ḳhud-dārī kab kahīñ pe phailāyā

ye to muhsinoñ kā hī iltifāt hai varna

har qadam pe duniyā ne ḳhud-kushī pe uksāyā

aarzū kī nagrī meñ ye hamīñ samajhte haiñ

ham ne dil ko ai 'rāhī' kis tarah se bahlāyā

pyar ka zamane mein hum ne ye sila paya

doston ne luTa hai zindagi ka sarmaya

band ho gae hum par doston ke darwaze

daur-e-muflisi tu ne aisa din bhi dikhlaya

main ne KHun-e-dil pi kar zindagi guzari hai

main ne dast-e-KHud-dari kab kahin pe phailaya

ye to muhsinon ka hi iltifat hai warna

har qadam pe duniya ne KHud-kushi pe uksaya

aarzu ki nagri mein ye hamin samajhte hain

hum ne dil ko ai 'rahi' kis tarah se bahlaya