pyar un ko dekh kar be-iKHtiyar aa hi gaya

pyaar un ko dekh kar be-iḳhtiyār aa hī gayā

vo jo aa.e dil mirā dīvāna-vār aa hī gayā

dil mire pahlū se jā.egā na aatā thā yaqīñ

ik nazar dekhā unheñ to e'tibār aa hī gayā

ab gayā un kā tasavvur jī gayā bīmār-e-ishq

shiddat-e-ġham meñ bhī chehre par nikhār aa hī gayā

bujhte bujhte jal uThe phir dīda-o-dil ke charāġh

sard siine meñ umīdoñ kā sharār aa hī gayā

aa.iye dohrā.eñ phir ulfat kī rañgīñ dāstāñ

phir vahī manzil vahī ahd-e-bahār aa hī gayā

bazm meñ aamad huī hai kis taġhāful-kesh kī

tishnagī-e-shauq ke dil ko qarār aa hī gayā

zikr-e-dard-e-dil pe vo bigḌā kiye lekin 'habīb'

lab pe iqrār-e-mohabbat ek baar aa hī gayā

pyar un ko dekh kar be-iKHtiyar aa hi gaya

wo jo aae dil mera diwana-war aa hi gaya

dil mere pahlu se jaega na aata tha yaqin

ek nazar dekha unhen to e'tibar aa hi gaya

ab gaya un ka tasawwur ji gaya bimar-e-ishq

shiddat-e-gham mein bhi chehre par nikhaar aa hi gaya

bujhte bujhte jal uThe phir dida-o-dil ke charagh

sard sine mein umidon ka sharar aa hi gaya

aaiye dohraen phir ulfat ki rangin dastan

phir wahi manzil wahi ahd-e-bahaar aa hi gaya

bazm mein aamad hui hai kis taghaful-kesh ki

tishnagi-e-shauq ke dil ko qarar aa hi gaya

zikr-e-dard-e-dil pe wo bigDa kiye lekin 'habib'

lab pe iqrar-e-mohabbat ek bar aa hi gaya