pyara sa KHwab nind ko chhu kar guzar gaya

pyārā sā ḳhvāb niiñd ko chhū kar guzar gayā

māyūsiyoñ kā zahr gale meñ utar gayā

āñkhoñ ko kyā chhalakne se rokā ġhazab huā

lagtā hai saarā jism hī ashkoñ se bhar gayā

dekhe tah-e-charāġh ghanī zulmatoñ ke daaġh

aur maiñ fuzūn-e-kaif-o-masarrat se Dar gayā

tanhā.iyāñ hī shauq se phir ham-safar huiiñ

jab nashsha-e-junūn-e-rifāqat utar gayā

kūche se bhī jo apne guzartā na thā kabhī

kyā soch kar uThā thā ki jaañ se guzar gayā

māmūlī hai ki sub.h jalātā huuñ ḳhud ko maiñ

hotā ye hai ki roz sar-e-shām mar gayā

ab jis ko jo samajhnā ho samjhā kare to kyā

'rāshid' tirā sukūt ajab kaam kar gayā

pyara sa KHwab nind ko chhu kar guzar gaya

mayusiyon ka zahr gale mein utar gaya

aankhon ko kya chhalakne se roka ghazab hua

lagta hai sara jism hi ashkon se bhar gaya

dekhe tah-e-charagh ghani zulmaton ke dagh

aur main fuzun-e-kaif-o-masarrat se Dar gaya

tanhaiyan hi shauq se phir ham-safar huin

jab nashsha-e-junun-e-rifaqat utar gaya

kuche se bhi jo apne guzarta na tha kabhi

kya soch kar uTha tha ki jaan se guzar gaya

mamuli hai ki subh jalata hun KHud ko main

hota ye hai ki roz sar-e-sham mar gaya

ab jis ko jo samajhna ho samjha kare to kya

'rashid' tera sukut ajab kaam kar gaya