pyas ne jam ki qimat ko baDha rakkha hai

pyaas ne jaam kī qīmat ko baḌhā rakkhā hai

varna kyā jaam meñ talḳhī ke sivā rakkhā hai

ham ko aa kar na Darā sail-e-havā se ai dost

ham ne dīpak ko nahīñ dil ko jalā rakkhā hai

jis kā jo haq hai vo baḳhshā hai barābar ham ne

aañkh meñ aks tirā dil meñ ḳhudā rakkhā hai

maañ ke paivand lage kapḌoñ se dil tang na ho

us ne tere liye malbūs nayā rakkhā hai

dushman-e-habs hai vo qāsid-e-ḳhushbū hai vo

isī nisbat se to naam us kā havā rakkhā hai

merā irfān-e-siyāhī na mukammal ho jaa.e

ek rauzan mire zindāñ meñ khulā rakkhā hai

vahī tūfāñ kā suvāgat kiyā kartā hai 'qamar'

jis ne kashtī ko kināre se judā rakkhā hai

pyas ne jam ki qimat ko baDha rakkha hai

warna kya jam mein talKHi ke siwa rakkha hai

hum ko aa kar na Dara sail-e-hawa se ai dost

hum ne dipak ko nahin dil ko jala rakkha hai

jis ka jo haq hai wo baKHsha hai barabar hum ne

aankh mein aks tera dil mein KHuda rakkha hai

man ke paiwand lage kapDon se dil tang na ho

us ne tere liye malbus naya rakkha hai

dushman-e-habs hai wo qasid-e-KHushbu hai wo

isi nisbat se to nam us ka hawa rakkha hai

mera irfan-e-siyahi na mukammal ho jae

ek rauzan mere zindan mein khula rakkha hai

wahi tufan ka suwagat kiya karta hai 'qamar'

jis ne kashti ko kinare se juda rakkha hai