pyasa hun reg-zar mein dariya dikhai de

pyāsā huuñ reg-zār meñ dariyā dikhā.ī de

jo haal pūchh le vo masīhā dikhā.ī de

har taaza vārid-e-ḳham-e-gesū ko dekh kar

mujh ko phir apnā ahd-e-tamannā dikhā.ī de

qurbat kī aañch aa.ī ki jalne lagā badan

duurī kā daur aaj chamaktā dikhā.ī de

lahje ke loch meñ hai gunāhoñ kī dilkashī

āñkhoñ meñ mābadoñ kā saverā dikhā.ī de

har zāviye ko jism ke ahl-e-nazar kī pyaas

har ḳhat tire badan kā sarāpā dikhā.ī de

chubhte hue libās kā chhantā huā jamāl

but-gar naqāb-e-sang ulaTtā dikhā.ī de

paḌtī hai saat rangoñ pe tere badan kī choT

jo rang tū pahan le vo gahrā dikhā.ī de

kyā kyā haqīqatoñ pe haiñ parde paḌe hue

tū hai kisī kā aur kisī kā dikhā.ī de

ḳhalvat kī anjuman hai vafāoñ kā silsila

kyā zikr-e-ishq husn bhī tanhā dikhā.ī de

is aas ne to apnā safīna Dubo diyā

tūfāñ thame to koī jazīra dikhā.ī de

dariyā pe āñsuoñ ke tujhe DhūñDhtā huuñ maiñ

paanī pe terā naqsh-e-kaf-e-pā dikhā.ī de

har shaḳhs apne aap ta.āqub meñ hai ravāñ

aalam tamām ek tamāshā dikhā.ī de

aao ki dekh aa.eñ farāmoshiyoñ kā shahr

mumkin hai koī apnā parāyā dikhā.ī de

'maḳhdūm' o 'jāmī' aah kahāñ kho ke rah ga.e

arz-e-dakan meñ 'shāz' akelā dikhā.ī de

pyasa hun reg-zar mein dariya dikhai de

jo haal puchh le wo masiha dikhai de

har taza warid-e-KHam-e-gesu ko dekh kar

mujh ko phir apna ahd-e-tamanna dikhai de

qurbat ki aanch aai ki jalne laga badan

duri ka daur aaj chamakta dikhai de

lahje ke loch mein hai gunahon ki dilkashi

aankhon mein mabadon ka sawera dikhai de

har zawiye ko jism ke ahl-e-nazar ki pyas

har KHat tere badan ka sarapa dikhai de

chubhte hue libas ka chhanta hua jamal

but-gar naqab-e-sang ulaTta dikhai de

paDti hai sat rangon pe tere badan ki choT

jo rang tu pahan le wo gahra dikhai de

kya kya haqiqaton pe hain parde paDe hue

tu hai kisi ka aur kisi ka dikhai de

KHalwat ki anjuman hai wafaon ka silsila

kya zikr-e-ishq husn bhi tanha dikhai de

is aas ne to apna safina Dubo diya

tufan thame to koi jazira dikhai de

dariya pe aansuon ke tujhe DhunDhta hun main

pani pe tera naqsh-e-kaf-e-pa dikhai de

har shaKHs apne aap taaqub mein hai rawan

aalam tamam ek tamasha dikhai de

aao ki dekh aaen faramoshiyon ka shahr

mumkin hai koi apna paraya dikhai de

'maKHdum' o 'jami' aah kahan kho ke rah gae

arz-e-dakan mein 'shaz' akela dikhai de