pyasa jo mere KHun ka hua tha so KHwab tha

pyāsā jo mere ḳhuuñ kā huā thā so ḳhvāb thā

nīñdoñ meñ zahr ghol rahā thā so ḳhvāb thā

kāñTā jo dil ke paar hai tā'bīr hai so ye

sahrā meñ ik gulāb khilā thā so ḳhvāb thā

ik iltijā thī āñkhoñ meñ pathrā ke rah ga.ī

ik 'aks sang-e-dar pe khaḌā thā so ḳhvāb thā

pahle zamīn ḳhaak huī thī ba-sad-niyāz

shab bhar phir āsmān jalā thā so ḳhvāb thā

ik nahr thī jo chīḳh rahī thī bahāv se

lashkar kanār-e-āb khaḌā thā so ḳhvāb thā

bastī kā chashm-dīd akelā gavāh huuñ

kal mere ās-pās ḳhudā thā so ḳhvāb thā

Duubī zavāl-e-shām ke hamrāh har umiid

palkoñ se TuuT kar jo girā thā so ḳhvāb thā

dil ko yaqīñ na zehn ke hadd-e-qayās meñ

jo vāqi'a 'mujībī' huā thā so ḳhvāb thā

pyasa jo mere KHun ka hua tha so KHwab tha

nindon mein zahr ghol raha tha so KHwab tha

kanTa jo dil ke par hai ta'bir hai so ye

sahra mein ek gulab khila tha so KHwab tha

ek iltija thi aankhon mein pathra ke rah gai

ek 'aks sang-e-dar pe khaDa tha so KHwab tha

pahle zamin KHak hui thi ba-sad-niyaz

shab bhar phir aasman jala tha so KHwab tha

ek nahr thi jo chiKH rahi thi bahaw se

lashkar kanar-e-ab khaDa tha so KHwab tha

basti ka chashm-did akela gawah hun

kal mere aas-pas KHuda tha so KHwab tha

Dubi zawal-e-sham ke hamrah har umid

palkon se TuT kar jo gira tha so KHwab tha

dil ko yaqin na zehn ke hadd-e-qayas mein

jo waqi'a 'mujibi' hua tha so KHwab tha