qabil-e-qadr to hai wa dar-e-zindan hona

qābil-e-qadr to hai vā dar-e-zindāñ honā

is pe turra tirī zulfoñ kā pareshāñ honā

saat pardoñ meñ chhupā jauhar-e-tābān-e-jamāl

is pe bhī sāmne ā.īne kā hairāñ honā

kitne aivān-e-falak-bām zamīñ-bos hue

kyā qayāmat hai dil-e-zār kā nālāñ honā

ham ne maanā ki ye hai āb-e-baqā kā mamba'

pahle sābit bhī to ho chashma-e-haivāñ honā

laaj rakhnī hai yahāñ rahne kī jaane vaalo

lāla-o-gul meñ kabhī kuchh to numāyāñ honā

laayā īmān ki 'māhir' bhī hai be-shak shā'ir

aaj hī dekhā hai kāfir kā musalmāñ honā

qabil-e-qadr to hai wa dar-e-zindan hona

is pe turra teri zulfon ka pareshan hona

sat pardon mein chhupa jauhar-e-taban-e-jamal

is pe bhi samne aaine ka hairan hona

kitne aiwan-e-falak-baam zamin-bos hue

kya qayamat hai dil-e-zar ka nalan hona

hum ne mana ki ye hai aab-e-baqa ka mamba'

pahle sabit bhi to ho chashma-e-haiwan hona

laj rakhni hai yahan rahne ki jaane walo

lala-o-gul mein kabhi kuchh to numayan hona

laya iman ki 'mahir' bhi hai be-shak sha'ir

aaj hi dekha hai kafir ka musalman hona