qafila yaad ka jis waqt rawan hota hai

qāfila yaad kā jis vaqt ravāñ hotā hai

vahī lamha tirī furqat meñ girāñ hotā hai

un se jab hāl-e-dil-e-zār bayāñ hotā hai

apnā har ashk ravāñ apnī zabāñ hotā hai

'aql kā hotā hai yā dil kā ziyāñ hotā hai

hosh ye ahl-e-mohabbat ko kahāñ hotā hai

sho'la-e-āriz-e-tābāñ ne jalāyā jab se

mujh ko phūloñ pe sharāroñ kā gumāñ hotā hai

jis qadar baḌhtī hai dushvārī-e-manzil apnī

hausla aur buland aur javāñ hotā hai

dair ho ka.aba ho mai-ḳhāna ho sab par ham ko

aap ke naqsh-e-kaf-e-pā kā gumāñ hotā hai

naam jab letā hai 'tanvīr' jigar kā koī

lab pe har rind ke yā-pīr-e-muġhāñ hotā hai

qafila yaad ka jis waqt rawan hota hai

wahi lamha teri furqat mein giran hota hai

un se jab haal-e-dil-e-zar bayan hota hai

apna har ashk rawan apni zaban hota hai

'aql ka hota hai ya dil ka ziyan hota hai

hosh ye ahl-e-mohabbat ko kahan hota hai

sho'la-e-ariz-e-taban ne jalaya jab se

mujh ko phulon pe shararon ka guman hota hai

jis qadar baDhti hai dushwari-e-manzil apni

hausla aur buland aur jawan hota hai

dair ho kaba ho mai-KHana ho sab par hum ko

aap ke naqsh-e-kaf-e-pa ka guman hota hai

nam jab leta hai 'tanwir' jigar ka koi

lab pe har rind ke ya-pir-e-mughan hota hai