qanun se hamari wafa do tarah ki hai

qānūn se hamārī vafā do tarah kī hai

insāf do tarah kā sazā do tarah kī hai

ik chhat pe tez dhuup hai ik chhat pe bārisheñ

kyā kahiye āsmāñ meñ ghaTā do tarah kī hai

kis ruḳh se tum ko chāheñ bhalā kis pe mar miTeñ

sūrat tumhārī jalva-numā do tarah kī hai

kāñToñ ko aab detī hai phūloñ ke saath saath

apne liye to bād-e-sabā do tarah kī hai

ḳhush ek ko kare vo kare ek ko nā-ḳhush

mahbūb ek hī hai adā do tarah kī hai

aisā kareñ ki aap kahīñ aur jā baseñ

is shahr meñ to āb-o-havā do tarah kī hai

qanun se hamari wafa do tarah ki hai

insaf do tarah ka saza do tarah ki hai

ek chhat pe tez dhup hai ek chhat pe barishen

kya kahiye aasman mein ghaTa do tarah ki hai

kis ruKH se tum ko chahen bhala kis pe mar miTen

surat tumhaari jalwa-numa do tarah ki hai

kanTon ko aab deti hai phulon ke sath sath

apne liye to baad-e-saba do tarah ki hai

KHush ek ko kare wo kare ek ko na-KHush

mahbub ek hi hai ada do tarah ki hai

aisa karen ki aap kahin aur ja basen

is shahr mein to aab-o-hawa do tarah ki hai