qanun to qudrat ka hai wahi insan badalte rahte hain

qānūn to qudrat kā hai vahī insān badalte rahte haiñ

ye hirs-o-havas ke dīvāne har aan badalte rahte haiñ

pahle to ḳhudā ke bande the ab paise ke sab ye bande haiñ

mausam kī tarah se duniyā meñ īmān badalte rahte haiñ

āñkheñ badlīñ phir dil badle tahzīb-o-tamaddun bhī badle

anjām kahāñ hogā us ke imkān badalte rahte haiñ

va.ada thā vafā karne kā kabhī ab jaur-o-jafā kī khaa.ī qasam

is par bhī kabhī pachhtāoge paimān badalte rahte haiñ

pahle to tumhīñ ko chāhā thā ab maut ko bhī ye chāhne lagā

dastūr nirāle haiñ dil ke armān badalte rahte haiñ

kal nāz-o-adā ke tiir chale hai aaj taġhāful kī barchhī

is ko bhī karam samjho 'najma' ehsān badalte rahte haiñ

qanun to qudrat ka hai wahi insan badalte rahte hain

ye hirs-o-hawas ke diwane har aan badalte rahte hain

pahle to KHuda ke bande the ab paise ke sab ye bande hain

mausam ki tarah se duniya mein iman badalte rahte hain

aankhen badlin phir dil badle tahzib-o-tamaddun bhi badle

anjam kahan hoga us ke imkan badalte rahte hain

wada tha wafa karne ka kabhi ab jaur-o-jafa ki khai qasam

is par bhi kabhi pachhtaoge paiman badalte rahte hain

pahle to tumhin ko chaha tha ab maut ko bhi ye chahne laga

dastur nirale hain dil ke arman badalte rahte hain

kal naz-o-ada ke tir chale hai aaj taghaful ki barchhi

is ko bhi karam samjho 'najma' ehsan badalte rahte hain