qasid-e-dil na sahi dushman-e-jaan bhejta hai

qāsid-e-dil na sahī dushman-e-jāñ bhejtā hai

'ishq ke zimn meñ vo kuchh to yahāñ bhejtā hai

barsar-e-bazm mahak tak se jo aatā nahīñ paas

apnī poshish bhī vo gul bā’d-azāñ bhejtā hai

kis tarah sulh kā imkān barāmad ho bhalā

us ko sar nazr kareñ to vo sināñ bhejtā hai

ruuTh kar bhej bhī detā hai hameñ ḳhud hī se duur

phir vahāñ ḳhud chalā aatā hai jahāñ bhejtā hai

kaun 'ālam hai ḳhudāvand izāla kun kā

maut ke hiile se ham ko tū kahāñ bhejtā hai

us kā ġham kyoñ na uThāveñ ba-sar-o-chashm 'habīb'

bārvar haiñ to hameñ bār-e-garāñ bhejtā hai

qasid-e-dil na sahi dushman-e-jaan bhejta hai

'ishq ke zimn mein wo kuchh to yahan bhejta hai

barsar-e-bazm mahak tak se jo aata nahin pas

apni poshish bhi wo gul ba’d-azan bhejta hai

kis tarah sulh ka imkan baramad ho bhala

us ko sar nazr karen to wo sinan bhejta hai

ruTh kar bhej bhi deta hai hamein KHud hi se dur

phir wahan KHud chala aata hai jahan bhejta hai

kaun 'alam hai KHudawand izala kun ka

maut ke hile se hum ko tu kahan bhejta hai

us ka gham kyon na uThawen ba-sar-o-chashm 'habib'

barwar hain to hamein bar-e-garan bhejta hai