qasid ke hath mujhko ye paigham milta hai

qāsid ke haath mujh ko ye paiġhām miltā hai

ab vo kisī se roz sar-e-shām miltā hai

bekār koshisheñ haiñ tujhe bhūlne kī dost

mujh ko har ik jagah tirā hamnām miltā hai

ham donoñ apnī apnī kahānī meñ mar ga.e

hālāt muḳhtalif the par anjām miltā hai

chalnā sañbhal ke shahr-e-mohabbat meñ ki yahāñ

har ek gaam par koī badnām miltā hai

mujh ko vo ishq karnā nahīñ hai mire aziiz

bastī meñ āj-kal jo sar-e-ām miltā hai

ahl-e-junūñ vo log haiñ be-zārī meñ jinheñ

aksar hī dard hone se ārām miltā hai

'kaunain' tere jaisī tabī.at nahīñ milī

aise bahut haiñ jin se tirā naam miltā hai

qasid ke hath mujh ko ye paigham milta hai

ab wo kisi se roz sar-e-sham milta hai

bekar koshishen hain tujhe bhulne ki dost

mujh ko har ek jagah tera hamnam milta hai

hum donon apni apni kahani mein mar gae

haalat muKHtalif the par anjam milta hai

chalna sanbhal ke shahr-e-mohabbat mein ki yahan

har ek gam par koi badnam milta hai

mujh ko wo ishq karna nahin hai mere aziz

basti mein aaj-kal jo sar-e-am milta hai

ahl-e-junun wo log hain be-zari mein jinhen

aksar hi dard hone se aaram milta hai

'kaunain' tere jaisi tabiat nahin mili

aise bahut hain jin se tera nam milta hai