qasid na aawe hai koi nama na aawe hai

qāsid na aave hai koī naama na aave hai

muddat huī hai koī dilāsa na aave hai

us kī taraf se to koī lait-o-la.al nahīñ

lekin hameñ hī ishq vaġhaira na aave hai

mahv-e-safar to ek zamāne se huuñ magar

qaabū meñ us ke shahr kā rasta na aave hai

deve hai jaan murġh-e-tamanna taḌap taḌap

is par bhī us ko lutf-e-tamāshā na aave hai

koshish kiye baġhair sar-e-mai-kada kahāñ

baiThe-biThā.e haath meñ paimāna aave hai

chupke se chhup ke jaave hai bazm-e-ḳhayāl se

us ko to aur koī bahāna na aave hai

jaane ko us galī meñ to jāveñ haiñ saare log

lekin kisī ko lauT ke aanā na aave hai

vo ḳhud hī chal ke aave to ban jaave koī baat

varna ḳhayāl us kā to rozāna aave hai

rokā hai us ko aane se ham ne ki us ke saath

is ghar meñ apnā aave hai begāna aave hai

nikle hue haiñ DhūñDne jis din se ham use

koī pata kahīñ se hamārā na aave hai

tum bhī to us dayār ke āḳhir ko ho liye

jā kar jahāñ se koī dobāra na aave hai

jā.ūñgā ḳhud hī us ko bulāne ke vāste

pyāse ke paas chal ke to dariyā na aave hai

paimāna-e-nigāh-e-sitamgar na ho to phir

'nāmī' kisī sharāb se nashsha na aave hai

qasid na aawe hai koi nama na aawe hai

muddat hui hai koi dilasa na aawe hai

us ki taraf se to koi lait-o-lal nahin

lekin hamein hi ishq waghaira na aawe hai

mahw-e-safar to ek zamane se hun magar

qabu mein us ke shahr ka rasta na aawe hai

dewe hai jaan murgh-e-tamanna taDap taDap

is par bhi us ko lutf-e-tamasha na aawe hai

koshish kiye baghair sar-e-mai-kada kahan

baiThe-biThae hath mein paimana aawe hai

chupke se chhup ke jawe hai bazm-e-KHayal se

us ko to aur koi bahana na aawe hai

jaane ko us gali mein to jawen hain sare log

lekin kisi ko lauT ke aana na aawe hai

wo KHud hi chal ke aawe to ban jawe koi baat

warna KHayal us ka to rozana aawe hai

roka hai us ko aane se hum ne ki us ke sath

is ghar mein apna aawe hai begana aawe hai

nikle hue hain DhunDne jis din se hum use

koi pata kahin se hamara na aawe hai

tum bhi to us dayar ke aaKHir ko ho liye

ja kar jahan se koi dobara na aawe hai

jaunga KHud hi us ko bulane ke waste

pyase ke pas chal ke to dariya na aawe hai

paimana-e-nigah-e-sitamgar na ho to phir

'nami' kisi sharab se nashsha na aawe hai