qaba-e-jaan ko sar-e-rah tar-tar na kar

qabā-e-jāñ ko sar-e-rāh tār-tār na kar

ye zindagī hai ise nazr-e-intishār na kar

ham ahl-e-dil haiñ mohabbat hamārā sheva hai

hamāre saath siyāsat kā kārobār na kar

judā huā hai to mujh ko na DhūñD rastoñ par

bichhaḌ gayā hai to ab merā intizār na kar

hameñ na dekh hamāre amal kī kar tauqīr

vajūd-e-asl-e-haqīqat ko sañgsār na kar

qubūl ham ko tirī be-ruḳhī kā har andāz

magar tū yuuñ sar-e-bāzār ham pe vaar na kar

uchhāl phir na fazā meñ lahū kī ye būñdeñ

sitam kī teġh ko yāroñ ke dil ke paar na kar

qaba-e-jaan ko sar-e-rah tar-tar na kar

ye zindagi hai ise nazr-e-intishaar na kar

hum ahl-e-dil hain mohabbat hamara shewa hai

hamare sath siyasat ka karobar na kar

juda hua hai to mujh ko na DhunD raston par

bichhaD gaya hai to ab mera intizar na kar

hamein na dekh hamare amal ki kar tauqir

wajud-e-asl-e-haqiqat ko sangsar na kar

qubul hum ko teri be-ruKHi ka har andaz

magar tu yun sar-e-bazar hum pe war na kar

uchhaal phir na faza mein lahu ki ye bunden

sitam ki tegh ko yaron ke dil ke par na kar