qadam baDhate hue bu-e-be-nishan ki taraf

qadam baḌhāte hue bū-e-be-nishāñ kī taraf

maiñ muḌ ke dekh na paayā thā kārvāñ kī taraf

kisī ko ḳhvāb meñ dekhā hai maiñ ne aate hue

gulāb le ke mire ḳhema-e-ḳhizāñ kī taraf

bichhā thā taḳht-e-shab-e-tīra jis ke āñgan meñ

diyā ravāna kiyā maiñ ne us makāñ kī taraf

khilā huā thā gul-e-intizār sāhil par

aur ik nigāh-e-tajassus thī bādbāñ kī taraf

nazar rahīn-e-gul-e-nau-shagufta thī 'rāshid'

maiñ kaise dekhtā us vaqt bāġhbāñ kī taraf

qadam baDhate hue bu-e-be-nishan ki taraf

main muD ke dekh na paya tha karwan ki taraf

kisi ko KHwab mein dekha hai main ne aate hue

gulab le ke mere KHema-e-KHizan ki taraf

bichha tha taKHt-e-shab-e-tira jis ke aangan mein

diya rawana kiya main ne us makan ki taraf

khila hua tha gul-e-intizar sahil par

aur ek nigah-e-tajassus thi baadban ki taraf

nazar rahin-e-gul-e-nau-shagufta thi 'rashid'

main kaise dekhta us waqt baghban ki taraf