qadam jab ghar se bahar kanch ke paikar uThate hain

qadam jab ghar se bāhar kāñch ke paikar uThāte haiñ

to phir hāthoñ meñ apne log bhī patthar uThāte haiñ

hamārī naav jo bach kar nikal aa.ī hai tūfāñ se

use ġharqāb karne ab kināre sar uThāte haiñ

maiñ ik majbūr huuñ mazlūm huuñ is shahr meñ shāyad

jabhī to log mujh par uñgliyāñ aksar uThāte haiñ

hamārī zindagī kā hai yahī dar-asl sarmāya

ġhamoñ kā bojh bhī ham roz-o-shab hañs kar uThāte haiñ

yaqīnan ruḳh badal letī haiñ phir sarkash havā.eñ bhī

jo ham apne safīne kā kabhī langar uThāte haiñ

faqat kuchh nuqra.ī sikkoñ kī ḳhātir aaj ahl-e-fan

qalam kis par uThānā thā qalam kis par uThāte haiñ

hazīmat donoñ aalam meñ faqat un kā muqaddar hai

jo bachche sāmne apne baḌoñ ke sar uThāte haiñ

nikalte haiñ jo aañsū dosto chashm-e-nadāmat se

farishte āsmāñ se aa ke ye gauhar uThāte haiñ

jo taqlīd-e-payambar ko shi.ār-e-zindagī kar leñ

maza jiine kā aise log hī behtar uThāte haiñ

qadam jab ghar se bahar kanch ke paikar uThate hain

to phir hathon mein apne log bhi patthar uThate hain

hamari naw jo bach kar nikal aai hai tufan se

use gharqab karne ab kinare sar uThate hain

main ek majbur hun mazlum hun is shahr mein shayad

jabhi to log mujh par ungliyan aksar uThate hain

hamari zindagi ka hai yahi dar-asl sarmaya

ghamon ka bojh bhi hum roz-o-shab hans kar uThate hain

yaqinan ruKH badal leti hain phir sarkash hawaen bhi

jo hum apne safine ka kabhi langar uThate hain

faqat kuchh nuqrai sikkon ki KHatir aaj ahl-e-fan

qalam kis par uThana tha qalam kis par uThate hain

hazimat donon aalam mein faqat un ka muqaddar hai

jo bachche samne apne baDon ke sar uThate hain

nikalte hain jo aansu dosto chashm-e-nadamat se

farishte aasman se aa ke ye gauhar uThate hain

jo taqlid-e-payambar ko shiar-e-zindagi kar len

maza jine ka aise log hi behtar uThate hain