qadam mila ke tujhe kaamyab maine kiya

qadam milā ke tujhe kāmyāb maiñ ne kiyā

ki tere ḳhvāb ko tābīr-e-ḳhvāb maiñ ne kiyā

zamāna tujh ko bahut pīchhe chhoḌ saktā thā

ye jaan le ki tujhe ham-rikāb maiñ ne kiyā

añdherā phailā to māyūsiyoñ ne gher liyā

nayā ujālā magar bāzyāb maiñ ne kiyā

mirī vafā kī badaulat mahak uThā sahrā

babūl tū ne ugāyā gulāb maiñ ne kiyā

maiñ jāntā thā ki fitrat tirī na badlegī

raqābatoñ se magar ijtināb maiñ ne kiyā

gale lagā le jo dushman ko vo farishta hai

yūñhī to tujh se nahīñ ehtisāb maiñ ne kiyā

usī kī bāñhoñ meñ TuuTe na saañs ai 'muztar'

jise masīhā samajh kar ḳhitāb maiñ ne kiyā

qadam mila ke tujhe kaamyab main ne kiya

ki tere KHwab ko tabir-e-KHwab main ne kiya

zamana tujh ko bahut pichhe chhoD sakta tha

ye jaan le ki tujhe ham-rikab main ne kiya

andhera phaila to mayusiyon ne gher liya

naya ujala magar bazyab main ne kiya

meri wafa ki badaulat mahak uTha sahra

babul tu ne ugaya gulab main ne kiya

main jaanta tha ki fitrat teri na badlegi

raqabaton se magar ijtinab main ne kiya

gale laga le jo dushman ko wo farishta hai

yunhi to tujh se nahin ehtisab main ne kiya

usi ki banhon mein TuTe na sans ai 'muztar'

jise masiha samajh kar KHitab main ne kiya