qadam qadam pe jo apna nishan banate hain

qadam qadam pe jo apnā nishāñ banāte haiñ

zamīñ pe chalte haiñ aur kahkashāñ banāte haiñ

har ek lamha vo tūfān par nazar rakkheñ

kanār-e-bahr jo apnā makāñ banāte haiñ

burī nazar na koī sarhadoñ se paar uThe

ham ab vatan ke liye pāsbāñ banāte haiñ

na bū-e-gul na anā kī ramaq milī un meñ

jo vahshatoñ kā sadā āshiyāñ banāte haiñ

hamāre baad kī nasleñ baneñgī kyā 'manzar'

zamīñ ko bātoñ meñ ham āshiyāñ banāte haiñ

qadam qadam pe jo apna nishan banate hain

zamin pe chalte hain aur kahkashan banate hain

har ek lamha wo tufan par nazar rakkhen

kanar-e-bahr jo apna makan banate hain

buri nazar na koi sarhadon se par uThe

hum ab watan ke liye pasban banate hain

na bu-e-gul na ana ki ramaq mili un mein

jo wahshaton ka sada aashiyan banate hain

hamare baad ki naslen banengi kya 'manzar'

zamin ko baaton mein hum aashiyan banate hain