qadam qadam pe lahu ka nishan rakhta hai

qadam qadam pe lahū kā nishān rakhtā hai

vo lauh-e-dil pe hasīñ dāstān rakhtā hai

daboch letā hai alfāz aur ma.ānī ko

nazar uqābī hai ūñchī uḌaan rakhtā hai

tarāshtā hai ḳhayāloñ meñ nit-na.e paikar

vo apnī fikr-e-rasā ko javān rakhtā hai

sa.ūbatoñ ke safīne meñ zinda rah kar bhī

vo zehn-o-dil kā khulā bādbān rakhtā hai

sameTtā rahā apne hī ḳhuun kī būñdeñ

jo apne haath meñ TuuTī kamān rakhtā hai

jhapaTtā hai khule jangal meñ sā.iqa ban kar

shikār bhī kahīñ ūñchā machān rakhtā hai

ye us kī zaat kī pahchān ban ga.ī hai 'ra.īs'

bhare dayār meñ ujḌā makān rakhtā hai

qadam qadam pe lahu ka nishan rakhta hai

wo lauh-e-dil pe hasin dastan rakhta hai

daboch leta hai alfaz aur maani ko

nazar uqabi hai unchi uDan rakhta hai

tarashta hai KHayalon mein nit-nae paikar

wo apni fikr-e-rasa ko jawan rakhta hai

saubaton ke safine mein zinda rah kar bhi

wo zehn-o-dil ka khula baadban rakhta hai

sameTta raha apne hi KHun ki bunden

jo apne hath mein TuTi kaman rakhta hai

jhapaTta hai khule jangal mein saiqa ban kar

shikar bhi kahin uncha machan rakhta hai

ye us ki zat ki pahchan ban gai hai 'rais'

bhare dayar mein ujDa makan rakhta hai