qadam-qadam pe Thaharte the Dar hi aisa tha

qadam-qadam pe Thaharte the Dar hī aisā thā

na tai huā kabhī ham se safar hī aisā thā

muhīb saa.e se aate rahe nazar har-sū

ye zikr-e-dasht nahīñ apnā ghar hī aisā thā

na raas aa.e haiñ aish-o-nishāt ke lamhe

nizām-e-dahr kā ham par asar hī aisā thā

koī bhī aib phaTakne na paayā paas apne

hamāre paas tilism-e-hunar hī aisā thā

hameñ ye shauq ki tūfāñ kī mauj se kheleñ

magar kināre pe laayā bhañvar hī aisā thā

yahīñ se aatī thiiñ har shab ajiib āvāzeñ

nagar se duur purānā khañDar hī aisā thā

añdherī vādiyāñ bhī ham ko jagmagātī lagīñ

hamāre paas charāġh-e-nazar hī aisā thā

har ek shaḳhs yahāñ thā mukhauTā pahne hue

tamām nagroñ meñ apnā nagar hī aisā thā

bahār aur ḳhizāñ ek se haiñ us ke liye

hamāre baaġh kā tanhā shajar hī aisā thā

na ḳham huā kisī jābir ke rū-ba-rū 'gauhar'

sadā buland rahā apnā sar hī aisā thā

qadam-qadam pe Thaharte the Dar hi aisa tha

na tai hua kabhi hum se safar hi aisa tha

muhib sae se aate rahe nazar har-su

ye zikr-e-dasht nahin apna ghar hi aisa tha

na ras aae hain aish-o-nishat ke lamhe

nizam-e-dahr ka hum par asar hi aisa tha

koi bhi aib phaTakne na paya pas apne

hamare pas tilism-e-hunar hi aisa tha

hamein ye shauq ki tufan ki mauj se khelen

magar kinare pe laya bhanwar hi aisa tha

yahin se aati thin har shab ajib aawazen

nagar se dur purana khanDar hi aisa tha

andheri wadiyan bhi hum ko jagmagati lagin

hamare pas charagh-e-nazar hi aisa tha

har ek shaKHs yahan tha mukhauTa pahne hue

tamam nagron mein apna nagar hi aisa tha

bahaar aur KHizan ek se hain us ke liye

hamare bagh ka tanha shajar hi aisa tha

na KHam hua kisi jabir ke ru-ba-ru 'gauhar'

sada buland raha apna sar hi aisa tha