qadam to rakh manzil-e-wafa mein bisat khoi hui milegi

qadam to rakh manzil-e-vafā meñ bisāt khoī huī milegī

vahīñ kahīñ naqsh-e-pā kī sūrat paḌī huī zindagī milegī

milegī haañ rañg meñ ḳhizāñ ke bahār Duubī huī milegī

talāsh kar ḳhār-zār-e-ġham meñ koī to kopal harī milegī

charāġh-e-sajda jalā ke dekho hai but-kada dafn zer-e-ka.aba

hudūd-e-islām hī ke andar ye sarhad-e-kāfirī milegī

habāb ashkoñ ke Dhāltā jā kamāl-e-shīsha-garī dikhā tū

tujhe inhīñ nāzuk ābgīnoñ meñ dil kī tasvīr bhī milegī

hudūd-e-dair-o-haram se haT kar jhukā jabīn-e-niyāz apnī

ġharaz se jab be-niyāz hogā to ujrat-e-bandagī milegī

falak par ik chāñd iid kā roz dekhne ko kahāñ se lā.ūñ

nazar kī sar-mastiyāñ na pūchho kahīñ sar-e-bām hī milegī

uThā bhī ab parda-e-takalluf samā bhī jā dil meñ dard ban kar

rahūñgā kab tak maiñ yūñhī behis kabhī mujhe zindagī milegī

hai jor-e-sayyād hī kā sadqa chaman kī hañgāma-āfrīnī

tabāhiyāñ jis jagah pe hoñgī vahīñ kahīñ zindagī milegī

vahī lab-e-ḳhushk par kuchh aaheñ vahī un āñkhoñ meñ kuchh namī sī

mujhe muqaddar se jab milegī matā-e-be-mā.igī milegī

raheñ salāmat satāne vaale ye hashr to roz hogā barpā

'sirāj' lekin sitam-rasīdoñ kī sabr kī daad bhī milegī

qadam to rakh manzil-e-wafa mein bisat khoi hui milegi

wahin kahin naqsh-e-pa ki surat paDi hui zindagi milegi

milegi han rang mein KHizan ke bahaar Dubi hui milegi

talash kar KHar-zar-e-gham mein koi to kopal hari milegi

charagh-e-sajda jala ke dekho hai but-kada dafn zer-e-kaba

hudud-e-islam hi ke andar ye sarhad-e-kafiri milegi

habab ashkon ke Dhaalta ja kamal-e-shisha-gari dikha tu

tujhe inhin nazuk aabginon mein dil ki taswir bhi milegi

hudud-e-dair-o-haram se haT kar jhuka jabin-e-niyaz apni

gharaz se jab be-niyaz hoga to ujrat-e-bandagi milegi

falak par ek chand id ka roz dekhne ko kahan se laun

nazar ki sar-mastiyan na puchho kahin sar-e-baam hi milegi

uTha bhi ab parda-e-takalluf sama bhi ja dil mein dard ban kar

rahunga kab tak main yunhi behis kabhi mujhe zindagi milegi

hai jor-e-sayyaad hi ka sadqa chaman ki hangama-afrini

tabahiyan jis jagah pe hongi wahin kahin zindagi milegi

wahi lab-e-KHushk par kuchh aahen wahi un aankhon mein kuchh nami si

mujhe muqaddar se jab milegi mata-e-be-maigi milegi

rahen salamat satane wale ye hashr to roz hoga barpa

'siraj' lekin sitam-rasidon ki sabr ki dad bhi milegi