qafas nigal gaya kisi ko dar ne nigal liya

qafas nigal gayā kisī ko daar ne nigal liyā

magar hameñ shab-e-firāq-e-yār ne nigal liyā

tumhāre vāste huzūr hādisa hai aur bas

ġharīb ghar ke āsare ko car ne nigal liyā

hazār baar tujh se ye kahā thā mat hisāb kar

hamāre pyaar ko miyāñ shumār ne nigal liyā

hamī prem chañd kī kahāniyoñ ke log haiñ

vo log jin kī umr ko udhār ne nigal liyā

vo jin ko ḳhud pe maan thā kisī kā rizq ho ga.e

shikāriyoñ ko ek din shikār ne nigal liyā

hamāre ġham ġhazal hue to gungunā diye ga.e

udāsiyoñ ke bain ko guitar ne nigal liyā

tumhāre baad ham 'hasan' ḳhizāñ ke haath lag ga.e

hamāre sabz jism ko bahār ne nigal liyā

qafas nigal gaya kisi ko dar ne nigal liya

magar hamein shab-e-firaq-e-yar ne nigal liya

tumhaare waste huzur hadisa hai aur bas

gharib ghar ke aasare ko car ne nigal liya

hazar bar tujh se ye kaha tha mat hisab kar

hamare pyar ko miyan shumar ne nigal liya

hami prem chand ki kahaniyon ke log hain

wo log jin ki umr ko udhaar ne nigal liya

wo jin ko KHud pe man tha kisi ka rizq ho gae

shikariyon ko ek din shikar ne nigal liya

hamare gham ghazal hue to gunguna diye gae

udasiyon ke bain ko guitar ne nigal liya

tumhaare baad hum 'hasan' KHizan ke hath lag gae

hamare sabz jism ko bahaar ne nigal liya