qahr tha hijrat mein KHud ko be-aman karna tera

qahr thā hijrat meñ ḳhud ko be-amāñ karnā tirā

dasht-e-nāmahfūz aur us meñ makāñ karnā tirā

is kahānī meñ mirā kirdār hī goyā na thā

yuuñ haqīqat ko mirī be-dāstāñ karnā tirā

chhin gayā ākāsh kā ḳhema to shām-e-hijr meñ

kuchh dhueñ ke bādaloñ ko āsmāñ karnā tirā

uf! ye majbūrī ki jab saare nasheman jal ga.e

TūTne vaale shajar par āshiyāñ karnā tirā

bhūlnā mushkil hai vo manzar ki mujh ko ek din

sar pe rakh kar haath yuuñ be-sā.ebāñ karnā tirā

mustaqil lā-hāsilī ko apnā hāsil maan kar

zindagī ko lamha lamha rā.egāñ karnā tirā

bad-gumānī kī ḳhalish paidā huī thī jin dinoñ

un dinoñ ko mere apne darmiyāñ karnā tirā

qahr tha hijrat mein KHud ko be-aman karna tera

dasht-e-namahfuz aur us mein makan karna tera

is kahani mein mera kirdar hi goya na tha

yun haqiqat ko meri be-dastan karna tera

chhin gaya aakash ka KHema to sham-e-hijr mein

kuchh dhuen ke baadalon ko aasman karna tera

uf! ye majburi ki jab sare nasheman jal gae

TuTne wale shajar par aashiyan karna tera

bhulna mushkil hai wo manzar ki mujh ko ek din

sar pe rakh kar hath yun be-saeban karna tera

mustaqil la-hasili ko apna hasil man kar

zindagi ko lamha lamha raegan karna tera

bad-gumani ki KHalish paida hui thi jin dinon

un dinon ko mere apne darmiyan karna tera