qaid-e-imkan se tamanna thi gamin chhuT gai

qaid-e-imkāñ se tamannā thī gamīñ chhūT ga.ī

paañv ham ne jab uThāyā to zamīñ chhūT ga.ī

liye jaatā hai ḳhalāoñ meñ jamāl-e-shab-o-roz

din kahīñ chhūT gayā raat kahīñ chhūT ga.ī

zindagī kyā thī maiñ ik mauj ke pīchhe thā ravāñ

aur vo mauj ki sāhil ke qarīñ chhūT ga.ī

būd-o-bāsh apnī na pūchho ki isī shahr meñ ham

zindagī laa.e the ghar se so yahīñ chhūT ga.ī

dil se duniyā tak ik aisā hī safar thā jis meñ

kahīñ dil aur kahīñ duniyā-e-hasīñ chhūT ga.ī

sub.h-dam dil ke makāñ se sabhī rishte TuuTe

dar-o-dīvār se fariyād-e-makīñ chhūT ga.ī

kyā ġharīb-ul-vatanī sī hai ġharīb-ul-vatanī

āsmāñ saath chalā ghar kī zamīñ chhūT ga.ī

qaid-e-imkan se tamanna thi gamin chhuT gai

panw hum ne jab uThaya to zamin chhuT gai

liye jata hai KHalaon mein jamal-e-shab-o-roz

din kahin chhuT gaya raat kahin chhuT gai

zindagi kya thi main ek mauj ke pichhe tha rawan

aur wo mauj ki sahil ke qarin chhuT gai

bud-o-bash apni na puchho ki isi shahr mein hum

zindagi lae the ghar se so yahin chhuT gai

dil se duniya tak ek aisa hi safar tha jis mein

kahin dil aur kahin duniya-e-hasin chhuT gai

subh-dam dil ke makan se sabhi rishte TuTe

dar-o-diwar se fariyaad-e-makin chhuT gai

kya gharib-ul-watani si hai gharib-ul-watani

aasman sath chala ghar ki zamin chhuT gai