qalam kabaad mein de di kitab raddi mein

qalam kabāḌ meñ de dī kitāb raddī meñ

faroḳht kar diye āñkhoñ ne ḳhvāb raddī meñ

ajab nahīñ jo mirā harf bhī hai be-tauqīr

suḳhan paḌe haiñ yahāñ be-hisāb raddī meñ

kuchh is tarah diyā tartīb āqibat kā ghar

gunāh shelf pe rakkhe savāb raddī meñ

mahak rahe haiñ ajab taur fāltū kāġhaz

kisī ne pheñke hoñ jaise gulāb raddī meñ

maiñ ab kī baar jo aḳhbār pheñkne ko gayā

ajab dikhā.ī diyā iztirāb raddī meñ

hayāt-o-maut ke radd-o-qubūl meñ hai jo piir

guzārā kuuḌe pe bachpan shabāb raddī meñ

tamām shahr meñ 'tāriq' baḌī talāsh ke baad

maiñ ḳhud ko ho hī gayā dastiyāb raddī meñ

qalam kabaD mein de di kitab raddi mein

faroKHt kar diye aankhon ne KHwab raddi mein

ajab nahin jo mera harf bhi hai be-tauqir

suKHan paDe hain yahan be-hisab raddi mein

kuchh is tarah diya tartib aaqibat ka ghar

gunah shelf pe rakkhe sawab raddi mein

mahak rahe hain ajab taur faltu kaghaz

kisi ne phenke hon jaise gulab raddi mein

main ab ki bar jo aKHbar phenkne ko gaya

ajab dikhai diya iztirab raddi mein

hayat-o-maut ke radd-o-qubul mein hai jo pir

guzara kuDe pe bachpan shabab raddi mein

tamam shahr mein 'tariq' baDi talash ke baad

main KHud ko ho hi gaya dastiyab raddi mein