qalam ki nok pe rakkhunga is jahan ko main

qalam kī nok pe rakkhūñgā is jahān ko maiñ

zamīñ lapeT ke rakh duuñ ki āsmān ko maiñ

aziiz jaañ ho jise mujh se vo gurez kare

ki aaj aayā huā huuñ ḳhud apnī jaan ko maiñ

hai mauj mauj muḳhālif mire safīne kī

aur us pe kholne vaalā huuñ bādbān ko maiñ

fareb-e-zāt se bāhar nikal ke dekh mujhe

batā rahā huuñ zamāne kī ān-bān ko maiñ

hamesha lafz kī hurmat kā paas rakkhā hai

baḌā aziiz huuñ lafzoñ ke ḳhāndān ko maiñ

agar maiñ chāhūñ to 'mumtāz' āsmāñ meñ uḌuuñ

gumāñ yaqīn ko de duuñ yaqīñ gumān ko maiñ

qalam ki nok pe rakkhunga is jahan ko main

zamin lapeT ke rakh dun ki aasman ko main

aziz jaan ho jise mujh se wo gurez kare

ki aaj aaya hua hun KHud apni jaan ko main

hai mauj mauj muKHalif mere safine ki

aur us pe kholne wala hun baadban ko main

fareb-e-zat se bahar nikal ke dekh mujhe

bata raha hun zamane ki aan-ban ko main

hamesha lafz ki hurmat ka pas rakkha hai

baDa aziz hun lafzon ke KHandan ko main

agar main chahun to 'mumtaz' aasman mein uDun

guman yaqin ko de dun yaqin guman ko main