qalam se rabta-e-rang-o-ab TuT gaya

qalam se rābta-e-rang-o-āb TuuT gayā

kisī musavvir-e-fitrat kā ḳhvāb TuuT gayā

ye dil ki sañg na thā ek ābgīna thā

na lā sakā tire jalvoñ kī taab TuuT gayā

savāl ye hai ki maiñ ne kisī se kyā paayā

javāb ye hai ki barsoñ kā ḳhvāb TuuT gayā

huā vo mujh se muḳhātab to yuuñ lagā jaise

koī sitāra-e-gardūñ-rikāb TuuT gayā

usūl-e-āmad-o-raft-e-bahār kyā kahiye

kalī jo shāḳh pe aa.ī gulāb TuuT gayā

ġhazal ke sher jo rusvā-e-intiḳhāb hue

bharam nazar kā pas-e-intiḳhāb TuuT gayā

rah-e-havas meñ thī haa.il zamīr kī āvāz

magar taqaddus-e-ahd-e-shabāb TuuT gayā

qalam se rabta-e-rang-o-ab TuT gaya

kisi musawwir-e-fitrat ka KHwab TuT gaya

ye dil ki sang na tha ek aabgina tha

na la saka tere jalwon ki tab TuT gaya

sawal ye hai ki main ne kisi se kya paya

jawab ye hai ki barson ka KHwab TuT gaya

hua wo mujh se muKHatab to yun laga jaise

koi sitara-e-gardun-rikab TuT gaya

usul-e-amad-o-raft-e-bahaar kya kahiye

kali jo shaKH pe aai gulab TuT gaya

ghazal ke sher jo ruswa-e-intiKHab hue

bharam nazar ka pas-e-intiKHab TuT gaya

rah-e-hawas mein thi hail zamir ki aawaz

magar taqaddus-e-ahd-e-shabab TuT gaya