qalandar tha koi sultan tha main

qalandar thā koī sultān thā maiñ

koī din dasht meñ mehmān thā maiñ

girā dekhā uThāyā na kisī ne

ki lā-vāris koī sāmān thā maiñ

chhuā tum ne to mujh meñ jaan aa.ī

to kyā itne dinoñ be-jān thā maiñ

mujhe ek aadmī ne maar Daalā

ḳhatā itnī thī ik insān thā maiñ

tumheñ maiñ yaad ab tak bhī nahīñ huuñ

haTo bhī itnā to āsān thā maiñ

duā.eñ thiiñ kisī kī saath mere

biinā daulat ke bhī dhanvān thā maiñ

'samīr' ab to havāle gard ke huuñ

mohabbat kā koī dīvān thā maiñ

qalandar tha koi sultan tha main

koi din dasht mein mehman tha main

gira dekha uThaya na kisi ne

ki la-waris koi saman tha main

chhua tum ne to mujh mein jaan aai

to kya itne dinon be-jaan tha main

mujhe ek aadmi ne mar Dala

KHata itni thi ek insan tha main

tumhein main yaad ab tak bhi nahin hun

haTo bhi itna to aasan tha main

duaen thin kisi ki sath mere

bina daulat ke bhi dhanwan tha main

'samir' ab to hawale gard ke hun

mohabbat ka koi diwan tha main