qalb-e-nalan teri aahon mein asar hai ki nahin

qalb-e-nālāñ tirī aahoñ meñ asar hai ki nahīñ

zulmat-e-shab tire pahlū meñ sahar hai ki nahīñ

shiddat-e-zabt meñ guzrī hai tire hijr kī shaam

ab tire saath mujhe izn-e-safar hai ki nahīñ

hai dhanak-rang mire jazba-e-dil kī tasvīr

tujh meñ ehsās koī misl-e-guhar hai ki nahīñ

pūchh lenā kabhī un se ai ġharībān-e-chaman

ki mire hāl-e-pareshāñ kī ḳhabar hai ki nahīñ

kab talak biich meñ hoñge ye pas-o-pesh batā

justujū merī tire pesh-e-nazar hai ki nahīñ

tere dil ko hai abhī uzr-e-mohabbat se gurez

fikr meñ terī kahīñ merā guzar hai ki nahīñ

dil ko hasrat tirī tā.īd-e-nazar kī hai faqat

tere andar kahīñ tūfān-e-sharar hai ki nahīñ

qalb-e-nalan teri aahon mein asar hai ki nahin

zulmat-e-shab tere pahlu mein sahar hai ki nahin

shiddat-e-zabt mein guzri hai tere hijr ki sham

ab tere sath mujhe izn-e-safar hai ki nahin

hai dhanak-rang mere jazba-e-dil ki taswir

tujh mein ehsas koi misl-e-guhar hai ki nahin

puchh lena kabhi un se ai ghariban-e-chaman

ki mere haal-e-pareshan ki KHabar hai ki nahin

kab talak bich mein honge ye pas-o-pesh bata

justuju meri tere pesh-e-nazar hai ki nahin

tere dil ko hai abhi uzr-e-mohabbat se gurez

fikr mein teri kahin mera guzar hai ki nahin

dil ko hasrat teri taid-e-nazar ki hai faqat

tere andar kahin tufan-e-sharar hai ki nahin