qalb-e-viran se rangin ghazal mange hai

qalb-e-vīrān se rañgīn ġhazal māñge hai

kaisī duniyā hai jo sahrā se kañval māñge hai

zindagī ab to har ik lamha ḳhudā jaane kyuuñ

mujh se pechīda savālāt ke hal māñge hai

ye na.ī tarz-e-siyāsat ye zabūñ-hālī ab

ham se māthe pe kuchh afkār ke bal māñge hai

jab se āvāra-mizājī ko qarār aayā hai

terī āġhosh meñ guzre hue pal māñge hai

daur-e-hāzir meñ gharauñdā bhī banānā mushkil

aur mumtāz mirī tāj-mahal māñge hai

is junūñ ne mujhe is darja sharaf baḳhshā hai

but-garī mujh se ajantā kā amal māñge hai

jazba-e-ishq diloñ se hai nadārat 'tashna'

āshiqī aaj kī bas raah saral māñge hai

qalb-e-viran se rangin ghazal mange hai

kaisi duniya hai jo sahra se kanwal mange hai

zindagi ab to har ek lamha KHuda jaane kyun

mujh se pechida sawalat ke hal mange hai

ye nai tarz-e-siyasat ye zabun-haali ab

hum se mathe pe kuchh afkar ke bal mange hai

jab se aawara-mizaji ko qarar aaya hai

teri aaghosh mein guzre hue pal mange hai

daur-e-hazir mein gharaunda bhi banana mushkil

aur mumtaz meri taj-mahal mange hai

is junun ne mujhe is darja sharaf baKHsha hai

but-gari mujh se ajanta ka amal mange hai

jazba-e-ishq dilon se hai nadarat 'tashna'

aashiqi aaj ki bas rah saral mange hai