qamar-gazida nazar se haala kahan se aaya

qamar-gazīda nazar se haala kahāñ se aayā

charāġh bujhne ke baa'd ujālā kahāñ se aayā

nadī meñ vo aur chāñd haiñ ek saath raushan

zamīn par āsmān vaalā kahāñ se aayā

ye ġhuncha ġhuncha siyāh bhañvre kī bosa-ḳhvāhī

savād-e-gulshan meñ ham-nivāla kahāñ se aayā

fazā kī ālūdgī thī pahle hī niim qātil

ye dil meñ ek aur daaġh kaalā kahāñ se aayā

qarīb-tar dostoñ se hone kī aarzū meñ

abhī abhī pusht par ye bhālā kahāñ se aayā

maiñ ḳhvāb meñ bhī tirī galī se nahīñ guzartā

ye donoñ talvoñ meñ surḳh chhālā kahāñ se aayā

kahāñ gayā sikka sikka qārūn kā ḳhazāna

'zubair' hāthoñ meñ ye piyāla kahāñ se aayā

qamar-gazida nazar se haala kahan se aaya

charagh bujhne ke ba'd ujala kahan se aaya

nadi mein wo aur chand hain ek sath raushan

zamin par aasman wala kahan se aaya

ye ghuncha ghuncha siyah bhanwre ki bosa-KHwahi

sawad-e-gulshan mein ham-niwala kahan se aaya

faza ki aaludgi thi pahle hi nim qatil

ye dil mein ek aur dagh kala kahan se aaya

qarib-tar doston se hone ki aarzu mein

abhi abhi pusht par ye bhaala kahan se aaya

main KHwab mein bhi teri gali se nahin guzarta

ye donon talwon mein surKH chhaala kahan se aaya

kahan gaya sikka sikka qarun ka KHazana

'zubair' hathon mein ye piyala kahan se aaya