qarar se rahen kya shoKH-e-be-hijab kahin

qarār se raheñ kyā shoḳh-e-be-hijāb kahīñ

Thahar sakā hai kisī vaqt āftāb kahīñ

hifāzat aap kareñ apnī naujavānī kī

na luuT le koī ye daulat-e-shabāb kahīñ

ye kaisī tīrgī mai-ḳhāne meñ hai be-sāqī

subū paḌe haiñ kahīñ sāġhar-e-sharāb kahīñ

harām mai-kade kī hai halāl kausar kī

kahīñ azaab hai bāda-kashī savāb kahīñ

vo apne josh-e-javānī meñ aap haiñ sarmast

sharāb se hai sivā nashsha-e-shabāb kahīñ

bas ek raat kī mehmān naujavānī thī

khulī jo aañkh na thā sub.h ko shabāb kahīñ

'shahīr' dād-e-vafā aur husn vāloñ se

ye vo savāl hai jis kā nahīñ javāb kahīñ

qarar se rahen kya shoKH-e-be-hijab kahin

Thahar saka hai kisi waqt aaftab kahin

hifazat aap karen apni naujawani ki

na luT le koi ye daulat-e-shabab kahin

ye kaisi tirgi mai-KHane mein hai be-saqi

subu paDe hain kahin saghar-e-sharab kahin

haram mai-kade ki hai halal kausar ki

kahin azab hai baada-kashi sawab kahin

wo apne josh-e-jawani mein aap hain sarmast

sharab se hai siwa nashsha-e-shabab kahin

bas ek raat ki mehman naujawani thi

khuli jo aankh na tha subh ko shabab kahin

'shahir' dad-e-wafa aur husn walon se

ye wo sawal hai jis ka nahin jawab kahin