qarib kuchh na mila dur se dhuan dekha

qarīb kuchh na milā duur se dhuāñ dekhā

qafas se chhūT ke kyā ḳhuub āshiyāñ dekhā

yahī hai sair faqīroñ kī aur yahī fariyād

zamīñ pe baiTh ga.e sū-e-āsmāñ dekhā

hue tamām jo sajde the duur ke ādāb

yahāñ se aur hai aalam ki āstāñ dekhā

hisār khīñch ke apne hī dil kā baiTh rahe

zamāne-bhar ko mohabbat se bad-gumāñ dekhā

chaman chaman tirī saireñ nazar bahār bahār

chaTak chaTak paḌe ġhunche jahāñ jahāñ dekhā

harīm-e-nāz pe vo rang-o-nūr kī bārish

harīm-e-nāz meñ kyā thā ye phir kahāñ dekhā

'razā' ne dil ko sajā kar tire tasavvur se

jahān-e-husn meñ ik husn-e-do-jahāñ dekhā

qarib kuchh na mila dur se dhuan dekha

qafas se chhuT ke kya KHub aashiyan dekha

yahi hai sair faqiron ki aur yahi fariyaad

zamin pe baiTh gae su-e-asman dekha

hue tamam jo sajde the dur ke aadab

yahan se aur hai aalam ki aastan dekha

hisar khinch ke apne hi dil ka baiTh rahe

zamane-bhar ko mohabbat se bad-guman dekha

chaman chaman teri sairen nazar bahaar bahaar

chaTak chaTak paDe ghunche jahan jahan dekha

harim-e-naz pe wo rang-o-nur ki barish

harim-e-naz mein kya tha ye phir kahan dekha

'raza' ne dil ko saja kar tere tasawwur se

jahan-e-husn mein ek husn-e-do-jahan dekha